نشر القيادي بالتيار الديمقراطي هشام العجبوني رسالة وصلته من أحد التونسيين المقيمين بالخارج، قال إنّه تعرّض للابتزاز من طرف الديوانة بميناء حلق الوادي.

وجاء في الرسالة ما يلي:

"البارحة روّحت لتونس عن طريق الباخرة كيف كلّ عام في عطلة الصيف مع عائلتي وأخي وعائلته (7 أطفال حاشى عويناتك).

الباخرة وصلت لميناء حلق الوادي على الساعة السادسة مساءً.

صدّقني بدون مبالغة، الميناء عبارة عن وكر لعصابات مافيا،
الريزو طايح في الميناء و أي واحد باش يخلّص أداءات عن البضاعة أو الأشياء إلي جايبهم لازم ينتظر، والله وحده يعلم متى يرجع الريزو!

جات التاسعة مساءًا ومازلنا ما عملنا شيء.

الأطفال تعبوا والنساء تعبوا والديوانيّة يتكيّفوا في الدخان موش على بالهم....

أنا إنسان أمقت الرشوة، ولكن البارحة إظطررت، وبقيت إلى الآن نادم وضميري يأنّب فيّا...

مشيت للديواني قتلوا خويا من فضلك هاو 50 euro, راني ما عادش نقدر نستنّى!

قلّي إستنّاني شويّا، مشى حكى مع عرفو ورجعلي قلّي خليهم 100 euro وتوّا تخرج في 20 دقيقة، قتلوا مشات معاك.

في ظرف 10 دقايق مشى جاب أوراق تصريح جدد، و عمّرلي هو، وركّح كل شيء، وفي عوض إلّي نخلّص 3000 دينار على الأشياء إلي جايبهم، ما خلّصت حتى ملّيم، وفعلا بعد 20 دقيقة كنت خارج الميناء.

مانيش فرحان بروحي بالشيء إلّي عملتو، لكن حقيقة لم يكن لي بديل، الله يغفرلي.

البلاد يبيعوها ب 100 euro!

أقسم لك انّه لم يلمس أي شيء من الأشياء إلّي جبتها.

البلاد يبيعوها، لا يهمهم شيء، ولا يوجد فيها صالح، كلّهم لصوص!".